- Hymnus - Corde natus ex parentis

Corde natus ex parentis
ante mundi exordium,
Alpha et Omega vocatus,
ipse fons et clausula
omnium quae sunt, fuerunt
quaeque post futura sunt.

S 2

Coporis formam caduci,
membra morti obnoxia
induit, ne gens periret
primoplasti ex germine,
merserat quam lex profundo
noxialis tartaro.

S 3

O beatus ortus ille,
Virgo cum puerpera
edidit nostram salutem
feta Sancto Spiritu,
et puer redemptor orbis
os sacratum protulit.

S 4

Ecce quem vates vetustis
concinebant saeculis,
quem prophetarum fideles
paginae spoponderant,
emicat promissus olim :
cuncta collaudent eum !

S 5

Gloriam Patri melodis
personemus vocibus ;
gloriam Christo canamus,
matre nato virgine,
inclitoque sempiternam
gloriam Paraclito.