- Hymnus - Magi videntes parvulum

Magi videntes parvulum
eoa promunt munera,
stratique votis offerunt
tus, myrrham et aurum regium.

S 2

Agnosce clara insignia
virtutis ac regni tui,
Puer, cui trinam Pater
praedestinavit indolem.

S 3

Regem deumque annuntiant
thesaurus et fragrans odor
turis Sabaei, at myrrheus
pulvis sepulcrum praedocet.

S 4

O sola magnarum urbium
maior Bethlem, cui contigit
ducem salutis caelitus
incorporatum gignere !

S 5

Hunc et prophetis testibus
isdemque signatoribus
testator et sator iubet
adire regnum et cernere.

S 6

Regnum quod ambit omnia
dia et marina et terrea
a solis ortu ad exitum
et tartara et caelum supra.

S 7

Iesu, tibi sit gloria,
qui te revelas gentibus,
cum Patre et almo Spiritu,
in sempiterna saecula.