- Hymnus - Vexilla regis...quo carne

Vexilla regis prodeunt
fulget crucis mysterium
quo carne carnis conditor
suspensus est patibulo.

S 2

Quo, vulneratus insuper
mucrone diro lanceae
ut nos lavaret crimine
manavit unda et sanguine.

S 3

Arbor docora et fulgida,
ornata regis purpura,
electa digno stipite
tam sancta membra tangere !

S 4

Beata, cuius brachiis
saecli pependit pretium ;
statera facta est corporis
praedam tulitque tartari.

S 5

Salve, ara, salve victima,
de passionis gloria,
qua vita mortem pertulit
et morte vitam reddidit !

S 6

O crux, ave, spes unica !
hoc passionis tempore
piis adauge gratiam
reisque dele crimina.

S 7

Te, fons salutis, Trinitas,
collaudet omnis spiritus ;
quos per crucis mysterium
salvas, fove per saecula.