- Hymnus - A solis ortus cardine

A solis ortus cardine
adusque terrae limitem
Christum canamus principem,
natum Maria Virgine.

S 2

Beatus auctor saeculi
servile corpus induit,
ut carne carnem liberans
ne perderet quos condidit.

S 3

Clausae parentis viscera
caelestis intrat gratia;
venter puellae baiulat
secreta quae non noverat.

S 4

Domus pudici pectoris
templum repente fit Dei;
intacta nesciens virum
verbo concepit Filium.

S 5

Enixa est puerpera
quem Gabriel praedixerat,
quem matris alvo gestiens
clausus Ioannes senserat.

S 6

Feno iacere pertulit,
praesepe non abhorruit,
parvoque lacte pastus est
per quem nec ales esurit.

S 7

Gaudet chorus caelestium
et Angeli canunt Deum,
palamque fit pastoribus
Pastor, Creator omnium.

S 8

Iesu, tibi sit gloria,
qui natus es de Virgine,
cum Patre et almo Spiritu,
in sempiterna saecula.