Regnantem sempiterna
Per saecla susceptura
Concio devote concrepa,
Factori reddendo debita,
Cui iubilant agmina caelica,
Eius vultu exhilarata.
Quem exspectant omnia terrea,
Eius nutu examinanda :
Districtum ad iudicia,
Clementem in potentia.
Tua nos salva, Christe, clementia,
Propter quos passus es dira.
Ad poli astra subleva nitida,
Qui sorde tergis saecula.
Influe, salus vera, effuga pericula.
Omnia ut sint munda, tribue pacifica.
Ut hic tua salvi misericordia,
Laeti regna post adeamus supera,
Qui regnas saecula per infinita. Amen
