- Veni Redemptor gentium

Veni Redemptor gentium
ostende partum Virginis
miretur omne saeculum
talis decet partus Deum.

S 2

Non ex virili semine
sed mystico spiramine
verbum Dei factum caro
fructusque ventris floruit.

S 3

Alvus tumescit Virginis,
claustrum pudoris permanet,
vexilla virtutum micant,
versatur in templo Deus.

S 4

Procedat e thalamo suo,
pudoris aula regia,
geminae gigas substantiae
alacris ut currat viam.

S 5

Aequalis aeterno Patri,
carnis tropaeo cingere,
infirma nostri corporis
virtute firmans perpeti.

S 6

Praesepe iam fulget tuum
lumenque nox spirat novum
quod nulla nox interpolet
fideque iugi luceat.

S 7

Sit, Christe, rex piissime,
tibi Patrique gloria
cum Spiritu Paraclito
in sempiterna saecula.