Timor et tremor venit in Ninivem civitatem magnam,
per quem sceleratae plebi indicitur ieiunium,
et luctuosa plebs induitur cilicio.
Contigit autem et regem nobilem
de solio suo descendere,
ut esset humilior cunctis lugentibus;
et prophetavit per universum regum:
omnes viri et sexus femineus non gustent quicquam,
boves et pecora non pascantur herbis terrae,
pueri et vituli non sugant matris ubera,
sed clament ad Deum in fortitudine ternis diebus,
ne patiantur ut Sodoma.
Sed tu, Deus omnipotens,
misericors et miserator,
misertus es miseris;
nos sumus opera tua,
quos dedisti Filio tuo in haereditatem sibi;
noli claudere aurem tuam ad preces nostras,
sed subleva clemens afflictionem populi,
illud revolvens quod pollicitus es, dicens:
convertimini ad me et ego revertar ad vos.
