- Hymnus - Christe redemptor omnium ex Patre

Christe, redemptor omnium,
ex Patre, Patris Unice,
solus ante principium
natus ineffabiliter.

S 2

Tu lumen, tu splendor Patris,
tu spes perennis omnium,
intende quas fundunt preces
tui per orbem servuli.

S 3

Salutis auctor, recole
quod nostri quondam corporis,
ex illibata Virgine
nascendo, formam sumpseris.

S 4

Hic praesens testatur dies,
currens per anni circulum,
quod solus a sede Patris
mundi salus adveneris.

S 5

Hunc caelum, terra, hunc mare,
hunc omne quod in eis est,
auctorem adventus tui
laudat exultans cantico.

S 6

Nos quoque, qui sancto tuo
redempti sumus sanguine,
ob diem natalis tui
hymnum novum concinimus.

S 7

Iesu, tibi sit gloria,
qui natus es de Virgine,
cum Patre et almo Spiritu,
in sempiterna saecula.