- Hymnus - Quicumque Christum quaeritis

Quicumque Christum quaeritis,
oculos in altum tollite:
illic licebit visere
signum perennis gloriae.

S 2

Haec stella, quae solis rotam
vincit decore ac lumine,
venisse terris nuntiat
cum carne terrestri Deum.

S 3

En, Persici ex orbis sinu,
sol unde sumit ianuam,
cernunt periti interpretes
regale vexillum magi.

S 4

Quis iste tantus, inquiunt,
regnator astris imperans,
quem sic tremunt caelestia,
cui lux et aethra inserviunt ?

S 5

Illustre quiddam cernimus
quod nesciat finem pati,
sublime, celsum, interminum,
antiquius caelo et chao.

S 6

Hic, ille rex est gentium
populique rex Iudaici,
promissus Abrahae patri
eiusque in aevum semini.

S 7

Iesu, tibi sit gloria,
qui te revelas gentibus,
cum Patre et almo Spiritu,
in sempiterna saecula.