- Hymnus - O lux beata caelitum

O lux beata caelitum
et summa spes mortalium,
Iesu, cui domestica
arrisit orto caritas.

S 2

Maria, dives gratia,
o sola quae casto potes
fovere Iesum pectore,
cum lacte donans oscula.

S 3

Tuque ex vetustis patribus
delecte custos Virginis,
dulci patris quem nomine
divina proles invocat.

S 4

De stirpe Iesse nobili
nati in salutem gentium,
audite nos, qui supplices
ex corde vota fundimus.

S 5

Qua vestra sedes floruit
virtutis omnis gratia,
hanc detur in domesticis
referre posse moribus.

S 6

Iesu, tuis oboediens
qui factus es parentibus,
cum Patre summo ac Spiritu
semper tibi sit gloria.