Christe Pater misericordiarum,
qui tempus acceptabile reis indulges,
reminiscere miserationum tuarum,
et quos hucusque toleras ad paenitentiam compunge.
Peccavimus, Domine,
in omnem iustitiam tuam,
et iniquitates nostrae abstulerunt nos;
et tu iratus es,
et avertisti faciem tuam,
et possederunt nos Domini absque te.
Sed respice;
tu Pater noster es et nos lutum;
ne irascaris satis,
neque multitudinem viscerum tuorum super nos contineas ultra;
sed parce, placare, attende,
et fac nobis iuxta multitudinem benignitatis tuae,
ut in die bona quam tu fecisti,
o fons David patens in ablutione menstruatae,
nec confundamur in nobis, sed laetemur in te.
